عزرائيله! روح مې واخله.
پاتې ژوند مې دربښلی
خپل صنم مې دی بايللی
په مات شوي زړګي خاندم
نه یم هيچا پېژندلی
عزرائيله! روح مې واخله.
نه سکون او نه راحت شته
نه طاعت او عبادت شته
دا به منې ما ليدلي
محبت پسې نفرت شته
عزرائيله! روح مې واخله
په ژوندون یم لکه مړی
زه د ځان ازار وهلی
مينه نکړم مېنه نشته
همدې نوم یم شرمولی
عزرائيله! روح مې واخله.
په سلګو کې راپه زړه شي
په نشو کې راپه زړه شي
چې يې غواړم نه دا راشي
په خوبو کې راپه زړه شي
عزرائيله! روح مې واخله
عزرائيله ولې چوف یې?
په يوه ګل کې مې روح يوسه
چې خبر هم په ځان نشم
په کابل کې مې روح یوسه
عزرائيله لاس دې راکړه
په منګول کې مې روح یوسه
د یار زلفې مې کفن کړه
په اوربل کې مې روح یوسه
عزرائيله! روح مې واخله
عزرائيل زما جانان دی
عزرائيل افغانستان دی
جادوګر هم شاعر شوی
عزرائيل خو مې خپل ځان دی
عزارئيله! وصیت واخله
زما خپله ارواح واخله
عزرائيله! روح مې واخله
ـــــــــ
B
0 Comments